هام جدا ... خاص بقسم القصة

**مداح القمر** · 07-13-2007 08:05 PM

في البداية انا حابب اقول ان الموضوع ده انا عملته بالعامية تقريبا علشان يبئا أبسط و ما فيهوش كلكعة و الناس تفهمه
و كمان لأني مش حابب الاقي هنا في قسم القصة - زي مهو الحال في منتديات تانية -أعمال لا يمكن تكون أبدا قصص ... كلها حكاوي كدة بالبلدي و أخبار على مقالات على مقصوصات .. على اللي عنده كلمتين عاوز يقولهم و القلم مساعده ...
و علشان الارتقاء بالقسم أنا فكرت اعمل الموضوع ده ..
لازم نفهم يا جماعة ان القصة دي فن ادبي مهم جدا جدا و متميز جدا ....
و لازم نفهم كمان هو ايه و ايه شروطه و أسسه ..
يعني ايه قصة ؟ و يعني ايه نكتب قصة ؟...
القصة أولا هي قطعة نثرية ...
و اللي يفرقها عن المقال و الخاطرة حاجة اسمها الأحداث ... و توالي وتتابع الأحداث ... و السرد الملازم لهما ..
احنا ممكن نلاقي فيه مقال فيه اشخاص و شخصيات ... و فيه زمن و فيه أفعال و اقاويل ... لكن بيبئا الحدث بتاعه واحد بس ..
و كمان ممكن نلاقي المقال فيه نوع من السرد لكنه يفتقد توالي الأحداث و إلا أصبح قصة ...
اذا ممكن نقول ان اركان القصة الأساسية التي لا يمكن الاستغناء عنها في اي قصة هي ...
1 - الفكرة
2- الأحداث المتتابعة بمنطقية و المدعمة بالسرد ..
لأن غير كدة ما تبئاش قصة و تندرج تحت اي شيء تاني من انواع القطع النثرية ...
و القصة منها انواع ...
1- القصة القصيرة ... و دي نوع خاص جدا قصده الاختصار قدر الإمكان و عدم التطويل و حذف حاجات ممكن جدا الاستغناء عنها زي مثلا اسماء الأشخاص و حوارهم التفصيلي و كمان السرد التفصيلي و مكان و زمان القصة ... لكن من غير ما نحذف حاجة من الأركان اللي اتفقنا عليها ...
2- القصة ... و دي مش شرط تكون قصيرة و فيها اختزال يعني ... لكن يشترط وجود عقدة و حلها .
3- الرواية و دي مجموعة ضخمة من الأحداث الغير مطلوب اختصارها أبدا و لو تم اختصارها بتبوظ كدة بالبلدي و ما تنفعش ..
و بيبئا فيها الشخصيات المحورية و البطل و الشخصيات الثانوية و السرد بالتفصيل و تمتاز الرواية عن القصة بوجود التدرج للأحداث بداية ووسط و نهاية مع حتمية ذكر زمان و مكان الأحداث أو ترك ما يستدل منه القارئ عليهم ....
أتمنى يكون الموضوع مفيد لينا كلنا و يكون حقق المرجو منه للأعضاء المشاركين في قسم القصة هنا ..